Bruksel, 29 prill – Dhoma e poshtme e parlamentit të Belgjikës ka miratuar të enjten ndalimin e bartjes së burkave në vende publike dhe në rrugë. Ligji u miratua pa asnjë votë kundër.
Projektligjin e miratuar sot duhet tashti ta vërtetojë edhe Senati i Belgjikës dhe pritet se ligji do të hyjë në fuqi deri në muajin qershor apo më së largu korrik të këtij viti. Ky është ligji i parë i këtij lloji në Evropë.
Përjashtime do të lejohen vetëm në rast të festimeve të caktuara, nëse këtë e lejojnë autoritetet lokale. Në rast të shkeljes së ligjit parashihen dënime nga 15 deri në 25 euro, përkatësisht deri në shtatë ditë burgim, pos në rast të lejes policore për bartjen e burkës.
Politikanët belgë pohojnë se arsye kryesore e kësaj ndalese është çështje sigurie, pasi në vende publike duhet të jetë e mundshme identifikimi i personave. Por, sipas mendimit të kritikëve të kësaj ndalese, bëhet fjalë thjesht për masa populliste.
Krijoni Kontakt