Brukseli do te ndaloje importin e shpendeve nga Kroacia

[[A-SHKODRANI]]

Brukseli do te ndaloje importin e shpendeve nga Kroacia


Data e Publikimit: 22/10/2005

Autori i Lajmit:
24 ore
Komisioni Europian njoftoi dje në mbrëmje se po përgatitej të ndalonte importin e shpendëve të gjalla dhe nënprodukteve të tyre nga Kroacia pas zbulimit të virusit të gripit të shpendëve në kampione të mjelmave të marra në këtë vend.
Në një komunikatë, ekzekutivi europian saktëson se është informuar nga autoritetet veterinare kroate se virusi i gripit të shpendëve H5 ishte izoluar në kampione të marra tek disa mjelma të egra të cilat u gjetën të ngordhura në Zdenci (lindje).
Prania e virusit në disa kampione të marra nga gjashtë mjelma, nga rreth 15 shpendë të tillë të gjetur të ngordhura nga peshkatarët në afërsi të një liqeni, u njoftua më herët në Zagreb nga Ministria kroate e Bujqësisë.
"Komisioni Europian po përgatitit një vendim për të ndaluar importin e shpendëve të gjalla dhe nënprodukteve ë shpendëve nga Kroacia që do të miratohet me një procedurë emergjente ditën e hënë", shjegon Brukseli.
Gjatë kontakteve me Komisionin, autoritetet kroate "kanë afruar siguri se asnjë shpend i gjallë dhe se asnjë nënprodukt i shpendëve nuk është eksportuar nga Kroacia në drejtim të Bashkimit Europian", shton Komisioni, sipas të cilit, Zagrebi ka informuar tashmë edhe autoritetet veterinare të vendeve fqinje.
"Virusi është identifikuar si ai i gripit të shpendëve H5", vazhdon komunikata, e cila nuk saktëson qartë nëse virusi është aq i rrezikshëm sa H5N1, që ka shkaktuar më shumë se 60 të vdekur në Azi dhe që kohët e fundit është zbuluar edhe në Rumani dh në Turqi.
Nga ana tjetër, Brukseli njoftoi mbrëmë se është informuar se virusi H5, i gripit të shpendëve, është zbuluar edhe në një papagall të importuar nga Surinami dhe që është vënë në karantinë në Britaninë e Madhe.
"Autoritetet britanike kanë marrë të gjitha masat e duhura, përfshi dhe eliminimin e zogut të infektuar që u mbajt në karantinë me të", shpjegon Komisioni.