Postuar më parë nga
Modesti
Gruevski po injoron shqiptarët
27/03/2009 08:02:05
Analistët politik vlerësojnë se sjellja dhe deklarimet e fundit të kryeministrit Nikolla Gruevski shpalosin një injorim të skajshëm të shqiptarëve, duke bërë të qartë një porosi se vota shqiptare nuk duhet të jetë vendimmarrëse në Maqedoni
Kryeministri aktual Nikolla Gruevski vazhdon skajshmërisht të injorojë faktorin politik shqiptarë, duke anashkaluar, defaktorizuar dhe nëpërkëmbur votën shqiptare, vlerësojnë analistët politik shqiptar.
Lideri i VMRO-DPMNE-së, Nikolla Gruevski lidhur me raundin e dytë për zgjedhjen e presidentit, ku garon edhe kandidati i tyre, Gjorgje Ivanov nuk ka përmendur aspak rëndësinë e votës shqiptare në këto zgjedhje, edhe pse ajo është vendimtare, por deklarata e tij ishte se qytetarët duhet të dalin për të votuar dhe kandidatët për president në raundin e parë nuk kanë monopolin e tyre mbi zgjedhësit, duke apostrofuar me këtë rast partitë shqiptare.
Për këtë, analisti politik Jeton Shasivari theksoi se kjo deklaratë e dhënë e kryeministrit Gruevski është injorim i skajshëm dhe mjaft ekstrem i votës së elektoratit shqiptarë të Maqedonisë, porosia është e qartë se vota shqiptare nuk duhet në procesin e vendimmarrjes.
“Kjo është vazhdimësi e deklaratave të tilla mos harrojmë edhe një deklaratë që e dha para fillimit zyrtarë të këtij procesit të zgjedhjeve, ku në mënyrë publike tha që asnjëherë nuk do të kishte votuar për një kryetar shteti shqiptarë” theksoi ligjëruesi universitar, Jeton Shasivari. Sipas tij, këto deklarata janë tipike të provinciencës politike konservative nga e cila vjen kryeministri Gruevski.
“Deklaratat e tilla më tepër i bëjnë dëm ardhmërisë së Maqedonisë si shtet shumetnik me një demokraci multietnike, ku monoetnizimi i funksioneve shtetërore është shumë i dëmshëm” , tha analisti Jeton Shasivari.
Profesori universitar Nazmi Maliqi theksoi se është me rëndësi të vlerësohet sjellja e kryeministrit Gruevski pas zgjedhjeve.
“Prononcimi zyrtar i partisë së tij ishte se qytetarët e Republikës së Maqedonisë i votuan forcat të cilat nuk e ndërrojnë emrin në bisedime me Greqinë, kështu që ka një porosi për bllokimin e proceseve integruese të Maqedonisë në NATO dhe në BE” , tha prof. dr. Nazmi Maliqi. Sipas tij, kryeministri dhe lideri i VMRO-DPMNE-së, Nikolla Gruevski po luan një lojë të vrazhdë e cila nuk ka perspektivë dhe sjellë tensione e nervozizëm tek shqiptarët.
Prononcimi tjetër që ka qenë i ditur edhe më herët thekson Maliqi është se nuk i duhen votat e shqiptarëve dhe kjo është porosi edhe më vrazhdë ngase paraqitja e tij me konotacion populist për krijimin e një demokracie pa konkurrencë vazhdon të jetë në kokën e tij të ndërtimit të politik bërjes në Republikën e Maqedonisë .
“Deklaratat dhe sjellja e tij publike që këto ditë po e shohim nuk sjellë sinjale të mira për ndërtimin e një shteti multietnik me demokraci multietnike siç është Maqedonia”, ka theksuar ligjëruesi pranë universitetit FON, Nazmi Maliqi.(INA/SHM)
Krijoni Kontakt